የፌደራል ፍርድ ቤቶች የአምስት ዓመት (ከ2019 እስከ 2023) ረቂቅ ስትራቴጂያዊ እቅድ ላይ ውይይት ።
የፌደራል ፍ/ቤቶች 3ኛው ስትራቴጂያዊ እቅድ ማብቂያው በ2018 መሆኑን መነሻ በማድረግ በፌደራል ጠቅላይ ፍርድ ቤት አስተባባሪነት ሲዘጋጅ የቆየው 4ኛው የፌደራል ፍርድ ቤቶች የአምስት ዓመት (ከ2019 እስከ 2023) ረቂቅ ስትራቴጂያዊ እቅድ ላይ የፌደራል የመጀመሪያ ደረጃ ፍርድ ቤት የማኔጅመንት አባላት፣ የምድብ ችሎት ተጠሪ ዳኞች፣ አስተባባሪ ሬጅስትራሮች እና የስራ ክፍሎች ዳይሬክተሮች በተገኙበት ነሐሴ 14 ቀን 2018 ዓ.ም የግብዓት ማሰባሰቢያ ውይይት ተደረገ።
የፌደራል ፍርድ ቤቶች 4ኛው (ከ2019 እስከ 2023) ረቂቅ ስትራቴጂያዊ እቅዱ ለተሳታፊዎች አስቀድም በመላክ ጥያቄዎች እና አስተያየቶችን ለማቅረብ እንዲመቻቸው ተዘጋጅተው እንዲመጡ የተደረገ ሲሆን በተጨማሪም በአቶ ተስፋዬ ደጀኔ የዕቅድ ዝግጅት፣ ክትትል፣ ግምገማ እና ለውጥ ትግበራ ዳይሬክቶሬት ዳይሬክተር ዕቅዱን ከ3ኛው ስትራቴጂክ ዕቅድ ጋር በማነፃፀር በተለይም በአዲስ በተካተቱ ፍሬ ነገሮች ላይ በመመስረት ለተሰብሳቢው አቅርበዋል።
ከዚህ በተጨማሪም ክቡር ዳኛ አቶ የምስራች ከተማ የፌደራል የመጀመሪያ ደረጃ ፍርድ ቤቱ የአስተዳደር እና ሰው ሃብት ስራ አመራር ዋና ዳይሬክቶሬት ዳይሬክተር እና የአብይ ኮሚቴው አባል በሰነዱ ላይ ለውይይት መነሻ የሆኑ ሃሳቦችን አቅርበዋል።
ክቡር አቶ ፋዓድ ኪያር የፍርድ ቤቱ ፕሬዝዳንት መድረኩ ጠቃሚ እና ግብዓት ሊሆኑ የሚችሉ ፍሬ ሃሳቦችን ለመሰብሰብ መዘጋጀቱን በመግለፅ ሰነዱን ለማዳበር የሚያስችሉ ጥያቄዎች እና አስተያየቶች እንዲቀርቡ ለተወያዮች እድል የሰጡ ሲሆን ተሳታፊዎች አስቀድመዉ በፅሁፍ እንዲሁም በመድረኩ ላይ ጠቃሚ የሆኑ በርካታ ግብአቶች እና የማብራሪያ ጥያቄዎች አቅርበዋል።
በውይይቱ ማጠቃለያ በፕሬዝዳንቱ የማጠቃለያ ሃሳቦች እና ማብራሪያዎች የሰጡ ሲሆን ከተሳታፊዎች የቀረቡ አስተያየቶች እና ጥያቄዎች ተጠቃለው ለአዘጋጅ ኮሚቴው እንዲላክ አቅጣጫ ተቀምጦ ውይይቱ ተጠናቋል።
361